Урачыстая цырымонія пачалася роўна апоўдні з узняцця Дзяржаўнага сцяга Рэспублікі Беларусь. Ганаровае права ўзняць сцяг было прадастаўлена пераможцу жніва мінулага года — камбайнеру ААТ «Кухчыцы» Паўлу Шуцілу.
З прывітальным словам да хлебаробаў звярнуліся старшыня Клецкага раённага выканаўчага камітэта Юрый Пятровіч Карловіч і першы намеснік старшыні, начальнік упраўлення сельскай гаспадаркі і харчавання Вераніка Уладзіміраўна Пілецкая.
Галоўным госцем свята стаў старшыня Мінскага абласнога выканаўчага камітэта Аляксей Кушнарэнка. Губернатар павіншаваў працаўнікоў палёў з пачаткам жніва, пажадаў багатага ўраджаю і адзначыў, што аграрыям Міншчыны трэба будзе ўбраць збожжавыя і зернебабовыя культуры на плошчы больш за 500 тысяч гектараў. Для гэтага падрыхтавана амаль 1500 камбайнаў і больш за 1,5 тысячы механізатараў. Паводле прагнозаў, у Мінскай вобласці плануюць сабраць ад 2,7 да 3 мільёнаў тон зерня.
У знак павагі да працы хлебаробаў удзельніцы свята ў нацыянальных касцюмах паднеслі кіраўнікам вобласці і раёна караваі хлеба-солі.
.
Галоўныя героі жніва — камбайнеры — таксама не засталіся без увагі. Ад імя раёна і гаспадаркі ім уручылі караваі, выпечаныя мясцовымі гаспадынямі, і хлебны квас, каб работа спорылася, а сілы не ўбывалі.
Старшыня ААТ «Кухчыцы» Сяргей Паўлавіч Здрок афіцыйна даклаў аб гатоўнасці экіпажаў да ўборкі ўраджаю 2026 года і запэўніў, што хлеб будзе ўбраны своечасова і без страт. Атрымаўшы блаславенне ад старшыні райвыканкама, камбайны ўзялі старт, адправіўшыся ў палі пад легендарны марш «Развітанне славянкі». Губернатар асабіста ацаніў работу тэхнікі, праехаўшы па полі з азімым ячменем у адным экіпажы з рэкардсменам Паўлам Шуцілам. 
